السبت، 15 نوفمبر، 2014

ليه اتجوز؟؟

لو فكرت تسأل أي اتنين متجوزين سؤال بسيط ( اتجوزتوا ليه؟) في أغلب الأحيان بتلاقي صمت رهيب وتفكير عميق وممكن يقولك هو ده سؤال!!؟
 طبعاً حضرتك هتضيع وقتهم في كلام فارغ بالنسبة ليهم :( :( ... ولو لاقيت إجابه .. الراجل هيقول عشان الواحد يبقي ماشي في الحلال وبرضه سني كبر واهو لما يبقي عندي اطفال أكبر وأتسند عليهم وكمان مش عايز أكون وحيد .. وإجابة مراته.. عشان الاقي حد يحبني ونفسي أكون أم وطبعاً علشان المجتمع وقرفه والناس تقولي كبرتي وبقيتي عانس .. وأهو بقي ضل راجل ولا ضل حيطة ....

انا ماقولتش حاجة جديدة وتقريباً هو ده الواقع .. ودي تقريباً الأسباب اللي بتخلي الناس تدور علي فكرة الجواز سواء في مصر أو في أي بلد شرقي، وحتي لو بصيت علي الجواز في الغرب هتلاقي أغلب الأسباب دي مع بعض الإختلافات عشان إختلاف الثقافة ..

ومينفعش ننسي تأثير المجتمع الشرقي اللي وصل إلي الفكر الغربي ..
يعني علي سبيل المثال من الحاجات اللي اثرنا فيها علي الغرب، ان البنت اللي سنها بيكبر ومش متجوزة بينولها من الحب جانب من تريقة ومعايرة زي المصرية بالظبط .. يعني حتي لما جينا نسيب عندهم بصمة كانت بصمة سودا :) 

نيجي بقي للي لسه علي البر( تعبير شائع وكأن اللي بيتجوز بيغرق !!! بس بصراحة اللي فكرته كده عن الجواز هو فعلاً رايح للموت برجليه.)


ودي عينة من الإجابات اللي سمعتها كتير وطبعاً خبرات الناس اللي عرفتها من الكتب 


1- الإحساس بالوحدة: انا مقدرش أعيش لوحدي وعندي ملل وزهقان ونفسي يبقي في حد معايا            ( علي اساس انه عايز قرد يسليه !! :) )


2- الفراغ العاطفي: بقالي فترة مفيش حد في حياتي، نفسي الاقي حد يحبني( جوع عاطفي .. عايز ياخد )


3- رغبة في الاطفال: احنا اصلاً مخلوقين علشان نعمر الأرض وربنا قال كده بنفسه فا أنا هتجوز عشان يبقي عندي أطفال ( ده بالنسبة للشاب أما البنت تقول ربنا خلي عندنا غريزة الأمومة وتقريباً الحاجة الوحيدة اللي الواحدة بتستفادها من الجواز ان يكون عندها أطفال عشان هما اللي هيصبروها علي قرف الجواز....)


4- رغبة جنسية: عند الشاب الدافع الجنسي هو أكبر دافع للجواز .. بالنسبة له تسديد لإحتياج في اطار شرعي، ( ايه اللي يميز الإنسان بقي عن الحيوانات!؟؟)

بالنسبة للبنت ده كلام عيب وحرام .. عشان المجتمع ادي الحرية للشباب انهم يعبروا براحتهم عن العلاقة الجنسية أما البنت فهي لو جابت السيرة تبقي قليلة الأدب.. وده بيأثرعلي نظرة البنت للعلاقة الزوجية ويخليها تحس بالذنب وفي بعض الحالات تصاب بالبرود. 

5- كبر السن وإرضاء للمجتمع: انا خلاص كبرت عشان كده هدور علي عروسة،

( كأنه بيدور علي جهاز يشتريه بمواصفات علي مزاجه)، والبنت تقول انا اصلاً هحاول أتنازل وارضي بأي حد بدل الزن علي وداني واريح اهلي مني وارتاح انا منهم ومحدش يقدر يجيب سيرتي ...

6- سنة الحياة : يعني ما هي كل الناس بتتجوز ... عادي يعني امال احنا عايشين ليه؟؟  ماهوالجواز ده شر لابد منه ( لما هو شر بتروحله ليه !!؟؟)

7- حد يكملني : عندي حاجات نقصاني ونفسي الاقي نصي التاني 

8- عشان اكون سعيد: انا هفرح ومشاكلي هاتتحل لما اتجوز

أكيد الأسباب كتير بس دي أكتر حاجة منتشرة عموماً


ولما نجي نقول ان دي كلها دوافع غلط تيجي الناس تقولي امال ايه السبب اللي يخلي حد يتجوز... لما هي الأسباب دي كلها غلط يبقي مالهوش لازمة بقي اننا نتجوز.


فكر كده معايا .. تفتكر ان الناس اللي اتجوزت للأسباب دي فرحانه بجوازها؟؟؟؟؟!!!!!


احب اقولك ان كل اللي اتجوزوا للأسباب دي فشلوا وكمان عايشين حياة كلها يأس وإحباط ولو مش مصدق اسال أي اتنين وهتعرف :( 
ممكن يكونوا باينين ليك من بره ان كل حاجة تمام بس لو دخلت جوه حياتهم هتعرف المعاناة اللي بيعانوها.
( طبعا لو حاولوا ينقذوا جوازهم وتعبوا شوية واهتموا هيكون في امل انهم يعيشوا علي الاقل راضيين والي حد ما مبسوطين) بس للأسف مش كتير بيحاولوا عشان مش عايزين يتعبوا نفسهم لانهم كمان مش حاسين بأهمية الموضوع ..

طيب نتجوز ليه؟؟

الأسباب الحقيقية اللي تخيلك تفكر تتجوز
  • تلاقي حد بترتاح في الكلام معاه وبينكم كلام وأفكاروإسلوب ومعتقدات مشتركة، تعرفه كويس تحبه لنفسه مش عشان هو عنده وعنده...بمعني أدق تقرر تحبه عشان الحب قرار وإلتزام مش مجرد مشاعر طالعة ونازلة ..( مش معني كده ان المشاعر مش مهمة بالعكس هي نتجة لأفكارك .. يعني انت لما قررت تحب يعني فكرت ونتيجة للتفكير ده هتحب )، ولما تلاقي الشخص ده تنفتح عليه أكتر وتتكلم معاه عن كل اللي بتفكر فيه وبتحس بيه ( حوار مُتبادل)، وانت نفسك هتستفاد وتلاقي انك بتتعرف علي نفسك من خلال الشخص ده وكل مايكون في تفاهم وثقة وتواصل كل ما يكون في عمق أكتر وترابط يخلي كل الأسباب اللي فاتت هي نتيجة 
  • طبيعي جداُ انك اوقات تحس بالوحدة بس اللي مش طبيعي ان ده يكون سبب يخليك تفكر في الجواز... ولما تحس انك عايز حد تشاركه حياتك وتفرحه معاك وانت لفرحه تفرح وتكون معاه بتسنده وقت حزنه يبقي شعورك إنك مش عايز تكون وحيد ده سليم ...لكن مش مجرد انك زهقت ومليت ... لانك هتكتشف بعد الجواز ان الفراغ زاد وعمره ما هيتملي لانه جواك ... تسد الفراغ ده ازاي؟
 انك قبل ما تفكر في انك تتجوز تقعد مع نفسك وتواجه مشكلتك وتحاول علي قد ماتقدر تحلها .لأن عشان الجواز يكون ناجح لازم يكون عندك اكتفاء ذاتي وتقدرتعيش لوحدك علشان الحب عطاء فلما يكون عندك استعداد انك تدي شريك حياتك تلاقي حاجة تديهاله.. وعمر الحب ما كان تسديد لإحتياجات بالعكس، الحب انك تطلع بره ذاتك وتدخل للآخر .

في تشبيه جميل يوضح الفكرة، كأن الزوجين زي كوبايتين ميه مليانين كل واحد يدي للتاني فابيزيد عليه فتفضل الكوبايتين مليانين، لكن لو واحدة فاضية والتانية مليانة .. المليانة تدي الفاضية لا الفاضية بتتملي ولا المليانة بتفضل مليانة عشان هيجي وقت والأتنين هيبقوا فاضيين .. تخيل لو الكوبايتين فاضيين ؟ هيحصل ايه؟ عشان كده لما بيكون العطاء متبادل بيكون أفضل.


  • الحاجة الحقيقية في الموضوع إن الإنسان مولود وجواه إحتياج شديد وعطش للحب... ونقص الحب في الطفولة والتشوهات الفكرية والإضطرابات النفسية هي أكبر سبب خلي الناس توصل إلي مرحلة تسديد الإحتياجات في الكبر ودي لوحدها أنانية.. وطبعا ربنا هو مصدر الحب، والأب والأم بياخدوه من ربنا بعلاقتهم معاه وهما يدوه لأولادهم 
طيب نرجع نصحح اللي فات ازاى؟
اول حاجة تقررانك تقوي علاقتك الشخصية بربنا لأن ده أصعب قرار ... حاول حتي ولو بداية صغيرة عشان الحب اللي معرفوش اهلك يوصلوا ليك انت تاخدوا من ربنا بطريقة مباشرة، ووقتها هتعرف تحب نفسك ولما تحب نفسك هتعرف تحب غيرك ولو قررت تحب هتعرف تدي حب (خد الحب من مصدر الحب عشان تقدرتديه للي بتحب.)

  • لو فكرنا ان ممكن يكون سبب الإقدام علي الجواز هو وجود الأطفال .. يبقي مفيش داعي للجواز .لان في ناس ربنا مش بيديهم أطفال ولو بتحب الأطفال ممكن تتبني طفل. ولو اولادك كبروا يبقي مفيش داعي لإستمرار الجواز لأن الغرض منه اتحقق. 
لكن في الجواز الحقيقي الأطفال ثمرة للحب بين الزوجين .. ووجود الأطفال في حياتهم يخلي حياتهم الجميلة أجمل.


  • الطبيعي انك لما تلاقي الشخص المناسب ليك في كل اللي قولناه هتحب انك تكمل معاه حياتك.. لكن مش صح ان لما يجي في وجهة نظرك سن الجواز تدور علي عروسة ( وكأنك بتدورعلي حاجة مش انسان) وانتي ترضي بحد مش مناسب ليكي عشان سنك كبر... ياريت تتعامل مع نفسك ومع غيرك بأرقي من كده .( انت وانتي مش شئ انت وانتي اغلي من كده انت انسان)
  • السعادة ليها تعريفات كتيرة .. بتختلف من واحد للتاني، بس في فكرة منتشرة انك هتلاقي السعادة في الجواز..  لكن ده مش حقيقي ده وهم ، السعادة دي في ايدك انت ومن جواك رغم اي ظروف ومينفعش تستني حاجة من بره تسعدك عشان لو الحاجة دي اختفت من حياتك هتختفي سعادتك معاها..... وفي الجواز لما الإنسان يدي حياته للتاني يحصل علي السعادة لكن لما يدور عليها عند التاني مش هيلاقيها.
اتجوز صح تعيش سعيد