الاثنين، 8 ديسمبر، 2014

جيل المستقبل(مُصاب بكانسر من نوع جديد)

من كام سنة فاتت حصل تدهور رهيب، قصدي تطور في عالم الأغاني، ما أصل في زمنا ده كل كلمه ليها الف معني..  يعني م الآخر كده كل واحد عنده كلمتين محشورين في زوره راح غناهم علي أساس اننا ناقصين أمراض ما كفاية اللي احنا فيه... وطبعاً الكلمات القبيحة المسماه أغاني شعبية ( عفواً للأغاني الشعبية) إنتشرت بسرعة البرق.. لو حاجة عدله مش هتنجح كده  ( اه ما احنا ماشين بالعكس) 

وأكيد الحلوين دول مش هيطلعوا ويوصلوا إلا لو لقوا حد يتبناهم وطبعاً شركات الإنتاج عايزة تاكل عيش.. وهدفهم الوحيد انهم يلموا فلوس .. عندهم حق يعني هايحطوا شروط ايه ... صوت حلو ، احساس ، كلمات كويسة ، موسيقي راقية .. لا الكلام ده مابيجبش همه... طيب لما تفكرايه اللي خلاها انتشرت بسرعة وكمان عاجبة الناس أوي...اقولك ليه، اصلنا شعب يموت في النكد وأغلب الأغاني الشعبية نكد م الآخر ..المفروض يعني والطبيعي ان الناس تسمع أغاني وتدخل في مود الأغنية ،اما احنا لأ.. احنا شعب متميز نسمع الأغاني علي حسب المود.. وفي الغالب نكد ستايل ههههه


 وده كله كويس بالنسبة لشركات الإنتاج اللي استغلت الحالة المزاجية للشعب المصري، المغلوب علي امره، لأ وايه من شدة اعجاب الناس بالمدعوة أغاني شعبية كمان منتجين الأفلام استعانوا بالمغنيين الشعبيين واغانيهم الكريمة في الأفلام. :( :(

يعني مفيش داعي للمقاومة تهرب من الأغاني تلاقيهم في الأفلام !!... تقول بلاش أغاني وأفلام تلاقيهم  وراك في الإعلانات والبرامج .. مش مخليين حاجة إلا واتحشروا فيها.. وكل ده واصلاً معندهمش اي نوع من المواهب.

ولك ان تتخيل  لما يكونوا سواقين الميكروباصات وغيرهم هما المثل الأعلي للأجيال الجديدة تخيل الجيل ده هيبقي شكله عامل ازي!!؟

والحقيقية ان البشاير بانت يعني تلاقي الطفل عنده 5 سنين بيقلد بعرور ومش عارفة مين ..!! بيقلدهم في طريقة الكلام ونبرة الصوت اللي عاملة زي( صوت ال... بلاش شتيمة) مع انحناء الضهر إلي المنتصف وإبتعاد الأرجل عن بعض لمسافة متروتشويح بالأذرع ولوي الشفاه والبحلقة الغير طبيعية فتلاقي نفسك محتاج  كميات كبيرة من البيرسول عشان تقتل الحشرات اللي بتطلع من بقه... منظر يجيب اكتئاب  :(

ممكن حد يقولي مش عاجبك ما تسمعيش، ايه المشكلة بقي؟

أنا عن نفسي أتمني اني ما سمعش بس للأسف بسمع غصب عني  :(
التلوث السمعي(واخلاقي) ده هتلاقيه زي العفريت وراك في كل مكان.. يعني لو انت عندك فرح ومش بتحب الأغاني دي اعرف ان الفرح باظ ويتحول الفرح إلي عزا فتلاقي أصحاب الفرح بيتنازلوا ويشغلوها وامرهم لله ... ماهي الدوشة اللي في الأغاني الغريبة دي هي اللي بتظبط الدماغ  :)

الأغاني دي تأثيرها صعب أوي علي اللي مش بيحبها، يعني كلماتها تاخذك لبعيــــــد بعيــــــد.. مش عارفة فين، بس تقريباً لو واقف اعلي السلم هتلاقي نفسك وقعت تحت فجأة، وبعدين تنقلك من المستوي الفكري الطبيعي لتحت الصفر وكل ما تسمعها أكتر كل ما تلاقي المخ اتجمد .. وبعدها يتقالك مبروك مابقاش عندك مخ اصلاً ههههه

في يوم كان لسه اسم ( اوكا واورتيجا) جديد علي وداني وناس كتير في افلام او اعلانات او مسلسلات وبرامج كله بيتكلموا عن نجاح الاثنين .. ففكرت ان اسمع بيقولو ايه ... شكلهم هيقولوا حاجة كويسة عشان كده الناس معجبة بيهم .. المهم نزلت ليهم شريط اغاني .. هو طبعا كان باين من اسامي الأغاني انها غير مبشرة ... بس يلا أسمع وامري لله .. اخترت أغنية ولسه بسمع وبدأت احس بذهول اذبهلالي ( مش عارفة يعني ايه) وتوسع في بؤبؤ العين لدرجة الهبل ( نتيجة شده الصدمة) وانشطار فكري (تعطيل خلايا المخ ) وصداع ..مع عدم انتظام ضربات القلب ....لو كنت أعرف كنت عملت حسابي في ادوية لكل الاعطال هههه

كل ده وما كملتش الأغنية .. واستنيت شوية استعيد الذاكرة و مخي يشتغل وحاولت ادور علي اسم اغنية ممكن تبان انها عدلة وعملت لنفسي Restart  :) ، وسمعت واحدة جديدة وبدأت اتخنق من الألفاظ اللي في الأغنية وقفلتها وجربت واحدة كمان لالقيت ان مافيش فايدة...
ففكرت اني لازم اعمل Delete علي طول من اللاب الحقه قبل ما الفيرس ينتشر.. بصراحة خفت علي اللاب .. ماهو مش معقول يبقي انا وهو متضررين :)

واكترحاجة محيراني ونفسي افهمها ( واحد عايز يبطل سجاير وواحد بيغيرعلي الفاكهة وبيحب الحمار واللي عايز حته واللي مصدوم لما بص في المراية ) احنا مالنا بالمشاكل الشخصية والنفسية بتاعتهم .. ذنبنا ايه؟؟؟


ده غيراغنية اسنيجا دي اللي انا مش فاهمة معناها ولا فاهمة هما بيقولوا ايه !!
واللي تلاقي كلامها مفهوم تلاقيه كلام بذئ بيحط من قيمة الإنسان عموماً وخصوصاً المرأة، ومصيبة الأغاني دي انها عاملة زي الcancer لما ينتشريفضل لازق لحد ما يقضي علي كل حاجة.. 

دلوقتي عرفت قيمة الأغاني الشعبية القديمة ايام الخمسينات والستينات، مكنتش بحبها بس بعد التلوث السمعي بتاع اليومين دول عرفت قيمتها .. وللأسف حتي الأغاني دي مش عاتقينها وبيغنوها باسلوبهم الخاص :(  ليه ماكفاية اغانيهم واللي عملاه فينا)

وكل لما المصريين ما يلاقوش حاجة يفتخروا بيها حالياً يرجعوا يفتخروا بحضارة ال 7000 سنة اللي زلوا بيها كل العالم... لكن لو ركزوا شوية هيلاقوا حاجات كتيرة حلوة، وان المصريين مشرفين بلدهم ورافعين راسها وانها متميزة بحاجات مش هيلاقوها في بلد تانية :) :) مشرفينها بجد بطريقة تتحسد عليها ....
  • عندنا راقصات محليين ودوليين ههههه ( نقبل استيراد الخارج ههه) ،ودول ايه مش اي حاجة دول عندهم مواهب متعددة الواحده فيهم ترقص وبتمثل، وفيهم بيغنوا يعني 3 *1 زي كوفي ميكس كده :)
  •  مغنيين (مالهمش علاقة بالغني من الأساس ولا صوت ولا كلمات ولا اسلوب ولا منظرولا اي حاجة)

ده طبعا بعيد عن المغنيين الممتازين بس للأسف الناس سايبنهم ولازقين في الشعبي

  • عندنا شباب ايه بقي م الاخر بيتكلموا بطريقة عبده موته مش اي حد
  •  أطفال ( وده لقب كان يطلق قديماً علي صغيري السن..نظراً لانه اتلغي هههه)، من عمر 5 سنين تخاف منهم وتعملهم الف حساب بيشلوا مطوة وبيشربوا سجايرة .. 
  •  نتصدر قائمة اكبر نسبة تحرش قابلة انها تكون رقم واحد
  •  مسلسلات نص مشاهدها سجاير ومخدرات وتقولي بعمل وعي للشعب .. انت بتعمل وعي فعلا بس من نوع تاني
دي مجرد عينة بس ... والبقية تأتي 

احنا قدام ازمة ثقافية اخلاقية كبيرة، الكلام علي الأغلبية وليس الكل 
وعلي رأي معلق في اعلان اللي اتوسخ مبينضفش